教育嘅方法可能我地本地家長討論或考慮嘅係要跟從國際學校嘅方法定本地學校嘅方法，咁我作為兒科醫生覺得最重要嘅係因材施教，而每個家庭都應要有所有成員嘅一個討論同結果先至最重要。
舉個例子，有哋小朋友係好活躍嘅，雖然佢哋好醒目，學嘢好快，但事實上成日坐唔定，依類小朋友去國際學校上堂學習可能可以將佢哋嘅潛能發揮得更加好。亦有啲小朋友成日都唔係好積極，唔係好主動，如果唔叫佢都唔會理啲嘢，咁依一類小朋友可能督促佢哋多啲，傳統本地嘅學校對佢要求多啲，嚴格多啲，對佢嘅將來會有更加好嘅發展。
作為兒科醫生我哋都好清晰一樣嘢小朋友大部分都相對健康，所以你見到病患好大部分係一啲少見啲嘅病例如癌症、腎病，所以我相信依樣對我係無影響，不過事實上返工同我返屋企照顧我小朋友係有分別嘅，分別嘅係我嘅角色唔同。係屋企我可以用好多自己嘅感情去照顧我嘅小朋友，工作上面我需要好冷靜去提供一啲專業嘅意見俾家長同家庭，依樣相信係我哋兒科醫生最重要嘅嘢。
每個小朋友都有佢唔同嘅特質，好多時做咗爸爸媽媽之後開始認識自己，其實我哋自己都有唔同嘅特質，而呢樣嘢係我見咗咁多小朋友之後就明白：勉強無幸福，所以我覺得最重要幫到小朋友嘅方法就係鼓勵佢哋有自信心，令佢哋鐘意自己，認識自己，依個係我照顧小朋友嘅中心思想。
其實我哋面對嘅小朋友係將來社會嘅棟樑，係好有希望嘅一群我哋將來嘅中流砥柱，所以我哋對佢哋嘅影響係好大好大，對佢哋家庭嘅影響都好大，所以我覺得依個係一個好值得我哋花一生去做嘅一個工作，亦都係令我依加工作好滿足嘅一個原因。